Հին Արենի

Ամեն տարի հազարավոր զբոսաշրջիկներ են այցելում Հին Արենի գինու գործարան, որը նրանց հնարավորություն է տալիս ծանոթանալու ժամանակակից մեծամասշտաբ արտադրության տեխնոլոգիաներին, գինի համտեսելու և սնվելու։ Բացի այդ, Հին Արենին իր այցելուներին հնարավորություն է տալիս շրջել մոտակա խաղողի այգիներում ամենագնաց մեքենաներով, ինքնուրույն տեսնելու, թե ինչպես է Արենի սորտի խաղողը վերածվում գինու։ Կախված արտադրության ծանրաբեռնվածությունից, աշնան ամիսներին ընկերությունն առաջարկում է նաև խաղողաքաղի տուրերի ծառայություն։

Մեր գինիները

ՈՍԿԵՀԱՏ

Ոսկեհատը՝ ոսկե հատիկներով հայկական խաղողների թագուհին, իր հարուստ և անուշաբույր փնջի շնորհիվ վաղուց արժանացել է ժողովրդի սիրուն: «Հին Արենի Ոսկեհատ» գինին պատրաստված է գինեգործական հազարամյա ավանդույթներով աչքի ընկնող պատմական Արենի գյուղի խաղողի բերքից: Հրաբխային և նստվածքային ապարներով հարուստ Արենիի հողերը, համադրվելով հայկական բարձրավանդակին բնորոշ կլիմային, այս գինուն հաղորդում են յուրահատուկ արտահայտիչ կառուցվածք: Ճկուն և նրբագեղ, ծաղկաբույր այս գինին ունի մեղրի և ծիրանի համ և ախորժելի թեթև թթվություն:

ԱՐԵՆԻ

Հայկական բնաշխարհիկ (էնդեմիկ) խաղողի այս տեսակը՝ Արենին, մեզ է հասել հազարամյակների միջից՝ գոյատևելով բարձրավանդակային խստաշունչ կլիմային և ձևավորելով իր յուրահատուկ հատկանիշները նստվածքային ապարներով հարուստ հրաբխային հողերից: Ինտենսիվ կլիմայական և հողային պայմանների հակադրությունն այս գինու նրբագեղության հետ պարզապես սքանչելի է: Արենի, Սեյրակ Արենի, Թոզոտ և Մովուզ խաղողներից պատրաստված այս գինին իրենից ներկայացնում է շրջանի գինեգործների դարավոր հմտությամբ ձևավորված ավանդական համախառնուրդ (ասամբլյաժ): Բարդ, բայց միևնույն ժամանակ նուրբ, թեթևակի բարկ այս գինին քիմքին հաղորդում է կարմիր հատապտուղների համը: